X-Deal (Viva Digitales, Lawrence Fajardo, 2011)

May mga bagay daw na hindi kayang bilhin ng pera. Kalokohan, isang matalinhagang kalokohan. Bakit titigil ang mundo sa isang laos na kaisipan? Bakit? Pera lang ba ang pwedeng ipambili? Bakit hindi daanin sa palitan?

Aanhin pa ang pera kung ang prospect ng isang trade ay higit na kapanapanabik? Halimbawa na lang ang isang malupit na merchandise, kapalit ng isang malupit na commodity. O kaya isang mabangis na necessity, kapalit ng isang marugdog na kaligayahang hindi matutumbasan ng pera. Mga bagay nagpapadaloy ng dugo at pumupukaw sa isipan, katulad ng sex, drugs, at rakenrol.

Drugs at rakenrol ang mga bagay na pwedeng daanin sa isang malumanay na kaliwaan o ‘di kaya nama’y pasimpleng abutan. Dalawa lang ang patakaran, walang saulian, walang bawian.

Pagdating sa sex, ibang usapan na yan. Hindi naman sa nagpapakakonserbatibo o nagpapakamatimtimang birhen, pero talaga yatang may mga bagay na hindi man imposible, mahirap tapatan. 

Gayon pa man, tulad ng isa pang lumang kasabihan, everything has a price. Hindi man mabibili ng pera, maaari din namang matumbasan ng isang bagay na karapat-dapat. Kung ano man, kung sino man.

- Blog entry ni Dana (Jamilla Obispo)